Дьохсоҕоҥҥо үтүө үгэскэ кубулуйбут "СЫЛ БАСТЫҤНАРА"
Олунньу 8 күнүгэр, киэҺээ 7 чаастан В.Х.Тарбахов аатынан КСК.

Россияҕа Дьиэ кэргэн, Республикаҕа Оҕо саас, Таатта улууҺугар Таптал, Эрэл, Итэҕэл сылларын түмүктүүр, ааспыт сыл бастыҥнарын бэлиэтиир дьоро киэҺээ буолла.
Бу тэрээҺини А.Е.Кулаковскай аатынан оскуола-сад иилээн-саҕалаан ыытта. Эҕэрдэ тыл бастакынан аҕа баҺылыкпытыгар В.А.Охотиҥҥа бэрилиннэ.
Валентин Андреевич олохтоохтору эҕэрдэлээн баран республикаттан кэлбит улахан наҕарааданы аахта, "СР Тыатын хаҺаайыстыбатын бэтэрээнэ" бэлиэни убаастыыр киҺибит, чахчыта даҕаны оҕо сааҺыттан сүөҺү иитиитигэр имиллибит, күн баччатыгар диэри илиитин араарбакка төрөөбүт Даккытыгар үлэлии сылдьар Николай Николаевич Винокуров аатын истээт залга олорооччулар уруйдаан-айхаллаан ытыстарын тыаҺа хабылынна. Дьохсоҕон бочуоттаах олохтооҕо анал бэлиэни нэҺилиэкпит, улууспут ытык киҺитэ, республикаҕа киэҥник биллэр, култуура үтүөлээх үлэҺитэ, олоҥхоҺут, оҺуохай үтүөлээх этээччитэ, алгысчыт Афанасий Николаевич Поповка туттарда. 
"Үтүө суобастаах үлэтин уонна Таатта улууҺун баҺаарынай чааҺын сайдыытыгар тус кылаатын иҺин" анал бэлиэнэн наҕараадаланна 7-с нүөмэрдээх баҺаарынай чаас байыаҺа Эрчимэн Егорович Малышев.
НэҺилиэкпит Бочуот Грамотата туттулар Иосиф Владимирович Наумов, акушерка Туяра Александровна Неустроева. 

Салгыы "НэҺилиэк социальнай-экономическай сайдыытыгар кылаатын иҺин" анал бэлиэнэн наҕараадалыннылар
1. Тистяхов Владимир Гаврильевич
2. Потапова Галина Семеновна
3. Саввина Александра Романовна
4. Гладкин Иван Семенович
5. Власов Ньургун Иванович
6. Наумова Дария Семеновна
7. Ядрихинская Елена Николаевна
8. Игнатьева Алена Васильевна
9. Жараева Изабелла Семеновна.
Дьэ бу кэннэ "Сыл бастыҥнара" үөрүүлээх чааҺын ыытааччылар Саргылана Яковлева, Афанасий Собакин биллэрдилэр.
"Сыл бастыҥ ытык ыала" анал аат иҥэрилиннэ Татьяна Кирилловна, Дмитрий Дмитриевич Малышевтарга.
"Бастыҥ тыа хаҺаайыстыбатын үлэҺитэ" анал ааты "Победа" ХЭТ директора Г.Г.Винокуров туруу үлэҺиккэ Егор Егорович Никоновка туттарда.
"Сыл бастыҥ түмсүүтэ" буоллулар "Көмүс сүүтүк" иистэнньэҥнэрбит бөлөҕө, наҕарааданы туттарда Алампа аатынан НАДь директора И.С.Жараева.
"Бастыҥ өҥөнү оҥорооччу" анал ааты Валентин Андреевич "Намыына" кэрэ салоҥҥа туттарда.
"Идэтигэр бэриниилээх" анал аат хаҺаайынынан буолла Эрчимэн Егорович Малышев.
"Үйэлээҕи үйэтитээччи" анал аат ананна Мария Владимировна Сивцеваҕа.
"Дойду ситимэ" а.э. төрөөбүт түөлбэтин өрүү ааттатар, дойдутугар бэриниилээх киҺинэн буолла эдэр драматург Утум Егорович Захаров.
"Төрөппүт дьоло оҕолорунан" анал ааты Ураа! хаҺыынан туттулар Туйаара Сергеевна, Иван Васильевич Матвеевтар чиэстэннилэр.
"Сыл бастыҥ эдэр ыала" анал ааты үөрүүлээх быҺыыга туттулар Нарыйа Дмитриевна, Леонид Львович Поповтар.
"Өбүгэ үгэҺин тарҕатааччы" анал аат иҥэрилиннэ "ЭҺээ, эбээ үөрэҕин" ситимнээччилэрэ Любовь Константиновна Власова, интернационалист-буойун Владимир Петрович Колотинскай.
"ОДьКХ бастыҥ үлэҺитэ" анал аат тутталылынна Николай Тимофеевич Акимовка.
"Үтүө санаанан салайтаран" анал аат ананна субуотунньуктарга уонна да атын тэрээҺиннэргэ өрүүтүн бэйэтин баҕа санаатынан тиийэн итии аҺынан хааччыйар, үүнэр көлүөнэни ас абылаҥар үөрэтэр, үүннэрэр
киэн тутта ааттыыр элбэх оҕолоох ыал аҕата Семен Лукич Габышевы баҺылык дохсун ытыс тыаҺынан ааттаата.
Түгэнинэн туҺанан дьоро киэҺээни үрдүк таҺымҥа ыыппыт Саргылана Алексеевна салайааччылаах, иитэр үлэҕэ д.с. Наталья Егоровнаҕа, школа-сад коллективыгар барыгытыгар итии-истиҥ төлөннөөх эҕэрдэ, барҕа махтал буоллун! Саҥаттан саҥа үҥкүүлэр, кэрэни кэпсиир ырыалар, көрөөччүнү аралдьытар көрдөөх сыанкалар бу киэҺээни олуҺун диэн киэргэттилэр, 2 аҥар сылаалаах чааҺы биллэрбэккэ аҺардыбыт. Барыгытыгар дьолу-соргуну, ыстаал доруобуйаны, иллээх, эйэлээх күөх халлааны баҕарабыт. Этэҥҥэ буолуоҕуҥ, күндү нэҺилиэкпит олохтоохторо.