Сайылык күнүн көрсө Серовка.

Быйыл, ыам ыйын 23 күнүгэр, өр сылларга иитиэхтээбит баҕа санаабытын толорон,  холхуос, сопхуос саҕаттан үлэлии турар Серов сайылыгар күөх сайыны көрсө, сайылык күнүн бэлиэтии урукку-хойукку дайааркалары түмэн бэртээхэйдик сынньанан кэллибит.

Тиийбиппитигэр балай эмэ кэтэспит  "Победа" ХЭТ  (сал.Винокуров Г.Г.) сайылык ыаллара И.А., И.И.Павловтар, И.Р.Харайданова, В.Иванов, А.Тр., М.А. Никулиннар үөрэ-көтө көрүстүлэр. Саха дьонун сиэринэн, Мария Романовна, Мария Иннокентьевна алаадьылаан сырдьыгынаттылар, Ксения Михайловна саламааттаан дыргытта. Ытык сир иччилэриттэн көрдөҺөн алгыс сиэрин-туомун толордо, алгысчыт Вера Гаврильевна, арчыҺыт Мария Иннокентьевна сайылыкка тахсыы ситиитин аар хатыҥҥа ииллэ, сайыны көрсүү саламата баайылынна. Ол кэннэ баай-дуол астаах сандалы тардыллан күө-дьаа аҺылык саҕаланна, уруккуну-хойуккуну санаҺыы манна буолла, оонньуу-көр оройуттан тутулунна. НэҺилиэк эр дьоно кустаабыт байанайдарын бэлэҕин үөрдэ-көтүтэ сайылык ыалларыгар туттардыбыт. Түмүгэр ыанньыксыттар ыамнарын бириэмэтэ кэлэн, титииккэ тиийэн ынах ыылларын көрдүбүт.

Түгэнинэн туҺанан ыҥырыыбытын ылынан кэлбит ветеран ыанньыксыттарга, транспорынан хааччыйбыт баҺылыкпытыгар Валентин Андреевичка, куруук күлэн мүчүҥнүү сылдьар суопарбытыгар Борис Борисовичка ис сүрэхтэн тахсар махтал тылларын этэбит. Куруутун маннык көхтөөх буолуоҕун, санаабыккыт барыта сатаннын, толкуйдаабыккыт туола турдун. Дьиэ кэргэттэргитигэр доруобуйаны, этэҥҥэ буолууну, ил-эйэ эҥэрдэстин, куруутун күөх халлаан сыдьаайдын.

Алампа аатынан норуот айымньытын дьиэтин үлэҺиттэрэ.